ஆடி மாதத்தில் சுபகாரியங்களை தவிர்ப்பது ஏன்?

முன்னுரை

ஆடி மாதம், தமிழ் மாதங்களில் 4வது மாதம். ஆடி மாதத்தில் பல விழாக்கள், வழிபாடுகள் நடைபெறும். ஆனால், இந்த மாதத்தில் சுபகாரியங்கள் செய்வதை தவிர்ப்பது வழக்கம். ஆடி மாதத்தில் ஆட்டிப் படைக்குமா, சுபகாரியங்களை தவிர்ப்பதற்கான காரணங்கள் என்ன என்பதைப் பற்றி இந்த நித்ரா மேட்ரிமோனி பதிவில் பார்ப்போம்.

ஆடி மாதம்

வருடத்தின் அனைத்து மாதங்களுமே சிறப்பானவை என்றாலும், ஆடி மாதம் மிகவும் சிறப்புமிக்கது. ஆடி மாதத்தை கற்கடக மாதம் என்பர்.

சூரியன், குருவின் நட்சத்திரமான புனர்பூசத்தின் நான்காம் பாதத்தில் நுழையும் போது, கடக ராசியில் அடியெடுத்து வைக்கிறார். அந்த இனிய தருணமே ஆடி மாதத்தின் துவக்கமாகக் கொண்டாடப்படுகிறது.

தமிழ் மாதப் பிறப்புகளுக்கு ஒவ்வொன்றுக்கும் தனித்துவமான முக்கியத்துவம் உள்ளது. எனவே, அந்தந்த கால மற்றும் பருவ சூழ்நிலைக்கு ஏற்ப திருவிழாக்கள், உற்சவங்கள், மற்றும் விரத வழிபாடுகள் அமைக்கப்பட்டுள்ளன.

பொதுவாக, திருமணம் மற்றும் புதுமனை புகுவிழா போன்ற சுபநிகழ்ச்சிகளை ஆடி மற்றும் மார்கழி மாதங்களில் செய்யாமல் இருப்பது வழக்கம். இந்த மாதங்களில் சுபநிகழ்ச்சிகள் ஏதுவும் நடைபெறுவதில்லை. இதற்கான காரணத்தை இன்றைய பதிவில் ஆராய்ந்து தெரிந்து கொள்வோம்.

திருமணம்

ஆடி மாதத்தில் திருமணம் நடைபெற்றால், திருமணத் தம்பதிகளை பிரித்து வைப்பார்கள். ஏனெனில், ஆடி மாதத்தில் ஒரு பெண் கருவுற்றால், அவளுக்கு சித்திரை மாதத்தில் குழந்தை பிறக்கும். சித்திரை மாதத்தில் வெயிலின் தாக்கம் அதிகமாக இருக்கும். குறிப்பாக, கத்திரி வெயிலின் தாக்கம் கடுமையாக இருக்கும். எனவே, பிரசவ காலத்தில் பெண்ணுக்கும், பிறக்கும் குழந்தைக்கும் வெயில் காலம் சாதகமாக இருக்காது.

இந்த மாதத்தில் பிறக்கும் குழந்தைக்கு நோய் எதிர்ப்பு சக்தி குறைய வாய்ப்பு உள்ளது. மேலும், இளம் குழந்தையால் கத்திரி வெயிலின் வெப்பத்தை தாங்க முடியாது. இதனால் தான் ஆடி மாதத்தில் திருமணம் செய்வதையும், கணவன் மனைவி கூடி இருப்பதையும் தவிர்க்கின்றனர்.

இயற்கை மாற்றங்கள்

ஆடி மாதத்தில், பூமி தெற்கு திசை நோக்கி சாய்ந்து சுழல்கிறது. இதனால், இயற்கையில் சில மாற்றங்கள் ஏற்படுகின்றன. அதிக காற்று, நில அதிர்வுகள், கடல் சீற்றம் போன்றவை இதில் அடங்கும். "ஆடிக்காற்றில் அம்மியும் பறக்கும்" என்ற பழமொழி இருப்பது போல, ஆடி மாதத்தில் காற்று மிகவும் அதிகமாக வீசும். இது புதுமனை புகுவிழா, பூமி பூஜை போன்ற நிகழ்ச்சிகளுக்கு சிரமத்தை ஏற்படுத்தும். ஆடி மாதத்தில் திடீரென்று மழை பெய்யும் வாய்ப்பு அதிகம். இதுவே சுப நிகழ்ச்சிகளை நடத்துவதற்கு தடையாக அமையும்.

குலதெய்வ வழிபாடு

ஆடி மாதத்தில் விசேஷங்களும், திருவிழாக்களும் அதிகமாக இருக்கும். இதனால், கோவில்களுக்கு சென்று குலதெய்வத்தை குடும்பத்துடன் வழிபடும் வழக்கம் உள்ளது.

மேலும், இந்த மாதத்தில் விவசாயம் செய்ய வேண்டிய காலம் என்பதால், ஆடிப்பட்டம் தேடி விதை என்பதற்கேற்ப விவசாயிகள் விதைப்பு பணிகளில் ஈடுபடுவார்கள். விவசாயம் செழித்து வளம் பெருக வேண்டி, தங்கள் குலதெய்வத்தை வழிபடுவார்கள். எனவே, ஆடி மாதத்தில் வேறு எந்த விசேஷங்களும் செய்யப்படுவதில்லை.

வழிபாட்டுக்கு உகந்த மாதம்

ஆடி மாதம் பீடு நிறைந்த மாதமாகும். இதனால், இந்த மாதத்தில் மக்கள் இறைவனை வழிபட்டுத் தங்கள் மனபீடத்தை நிலைநிறுத்துகிறார்கள். இறைவனை வழிபடுவதற்காகவே ஒதுக்கப்பட்ட மாதம் என்பதால், திருமணம் போன்ற சுபநிகழ்ச்சிகள் இந்த மாதத்தில் நடத்தப்படுவதில்லை.

முடிவுரை

ஆடி மாதம், ஆன்மீக வழிபாடுகளுக்கு ஏற்ற மாதம். இந்த மாதத்தில் சுபகாரியங்களை தவிர்ப்பதன் மூலம், நாம் ஆன்மீகத்தில் அதிக கவனம் செலுத்த முடியும். மேலும், இந்த மாதத்தில் திருமணம் போன்ற சுபகாரியங்களை நடத்தினால், தம்பதிகளுக்கு இடையே பிரச்சனைகள் ஏற்படலாம் என்ற நம்பிக்கையும் உள்ளது. ஆடி மாதத்தில் சுபகாரியங்கள் செய்வது நல்லதா, கெட்டதா என்பது நம்பிக்கையை சார்ந்தது. ஆயினும், இந்த மாதத்தில் சுபகாரியங்களைத் தவிர்க்க பல காரணங்கள் இருப்பதை நாம் புரிந்துகொள்ள வேண்டும். வாழ்க்கை துணையை தேடுபவரா நீங்கள்? நித்ரா மேட்ரிமோனியில் உங்கள் ஜாதகத்திற்கு பொருத்தமான மணப்பெண் அல்லது மணமகனை சுலபமாக தேர்ந்தெடுக்கலாம்.